ਸੁਤੰਤਰਤਾ ਸੰਗਰਾਮੀ ਮਹਿਮਾ ਸਿੰਘ ਧਾਲੀਵਾਲ ਬਾਰੇ ਪੁਸਤਕ ਕੀਤੀ ‘ਲੋਕ ਅਰਪਣ’

ਚੰਡੀਗੜ : ਪੰਜਾਬ ਸਕੱਤਰੇਤ ਸਾਹਿਤ ਸਭਾ (ਰਜਿ:) ਚੰਡੀਗੜ ਅਤੇ ਮੁੱਲਾਂਪੁਰ ਗਰੀਬਦਾਸ ਦੇ ਵਾਸੀਆਂ ਵੱਲੋਂ ਅੱਜ ਪੰਜਾਬ ਕਲਾ ਭਵਨ ਚੰਡੀਗੜ ਵਿਖੇ ਵਿਸ਼ੇਸ਼ ਸਮਾਗਮ ਕਰਵਾਇਆ ਗਿਆ ਜਿਸ ਵਿੱਚ ਅਜਾਦੀ ਘੁਲਾਟੀਏ ਮਹਿਮਾ ਸਿੰਘ ਧਾਲੀਵਾਲ ਦੇ ਜੀਵਨ ਤੇ ਆਧਾਰਤ ਪੁਸਤਕ ‘ਉੱਘੇ ਸੁਤੰਤਰਤਾ ਸੰਗਰਾਮੀ ਦੀ ਜੀਵਨ ਗਾਥਾ- ਮਹਿਮਾ ਸਿੰਘ ਧਾਲੀਵਾਲ (ਮੁੱਲਾਂਪੁਰ ਗਰੀਬਦਾਸ)’ ਦਾ ਲੋਕ ਅਰਪਣ ਕੀਤਾ ਗਿਆ। ਇਸ ਪੁਸਤਕ ਦੇ ਲੋਕ ਅਰਪਣ ਦੀ ਰਸਮ ਪ੍ਰਸਿੱਧ ਸਾਹਿਤਕਾਰ ਮਨਮੋਹਨ ਸਿੰਘ ਦਾਊਂ, ਮਲਕੀਅਤ ਸਿੰਘ ਔਜਲਾ, ਤੇਜਦੀਪ ਸਿੰਘ ਸੈਣੀ ਪੀਸੀਐਸ, ਬਲਬੀਰ ਸਿੰਘ ਢੋਲ ਪੀਸੀਐਸ (ਰਿਟਾ.), ਪ੍ਰਿੰ. ਬਹਾਦਰ ਸਿੰਘ ਗੋਸਲ, ਭਗਤ ਰਾਮ ਰੰਗਾੜਾ, ਗੁਰਮੀਤ ਸਿੰਘ ਜੌੜਾ, ਰਾਜ ਕੁਮਾਰ ਸਾਹੋਵਾਲੀਆ, ਚਰਨਜੀਤ ਸਿੰਘ ਧਾਲੀਵਾਲ, ਅਰਵਿੰਦ ਪੁਰੀ, ਮੋਹਣੀ ਤੁਰ ਸੰਤੇਮਾਜਰਾ, ਰਵਿੰਦਰਪਾਲ ਕੌਰ, ਗੁਰਦਰਸ਼ਨ ਸਿੰਘ ਜੰਮੂ, ਧਿਆਨ ਸਿੰਘ ਕਾਹਲੋਂ, ਡਾ.ਬਲਰਾਮ ਸ਼ਰਮਾਂ ਅਤੇ ਸਰਪੰਚ ਜਤਿੰਦਰ ਸਿੰਘ ਧਾਲੀਵਾਲ ਵੱਲੋਂ ਨਿਭਾਈ ਗਈ।
ਸਕੱਤਰੇਤ ਸਾਹਿਤ ਸਭਾ ਦੇ ਪ੍ਰਧਾਨ ਅਤੇ ਇਸ ਪੁਸਤਕ ਦੇ ਸੰਪਾਦਕ ਮਲਕੀਅਤ ਸਿੰਘ ਔਜਲਾ ਵੱਲੋਂ ਆਏ ਹੋਏ ਮਹਿਮਾਨਾਂ ਨੂੰ ‘ਜੀ ਆਇਆਂ ਨੂੰ’ ਆਖਿਆ ਅਤੇ ਆਪਣੇ ਕਾਵਿਕ ਅੰਦਾਜ਼ ਵਿੱਚ ਵਿਚਾਰ ਪੇਸ਼ ਕੀਤੇ। ਗੁਰਮੀਤ ਸਿੰਘ ਜੌੜਾ ਵੱਲੋਂ ਇਸ ਪੁਸਤਕ ਬਾਰੇ ਪਰਚਾ ਪੜਿਆ ਗਿਆ। ਮੁੱਖ ਮਹਿਮਾਨ ਮਨਮੋਹਨ ਸਿੰਘ ਦਾਊਂ ਨੇ ਇਸ ਪੁਸਤਕ ਨੂੰ ਇਤਹਾਸਕ ਦਸਤਾਵੇਜ ਦੱਸਿਆ ਅਤੇ ਮਲਕੀਅਤ ਸਿੰਘ ਔਜਲਾ ਦੀ ਕਾਰਜਸ਼ੈਲੀ ਦੀ ਸਰਾਹਨਾ ਕੀਤੀ। ਤੇਜਦੀਪ ਸਿੰਘ ਸੈਣੀ, ਬਲਬੀਰ ਸਿੰਘ ਢੋਲ, ਬਹਾਦਰ ਸਿੰਘ ਗੋਸਲ, ਭਗਤ ਰਾਮ ਰੰਗਾੜਾ, ਪ੍ਰੋ.ਸ਼ਾਮ ਸਿੰਘ ਮਸਤਗੜ, ਜਸਵੰਤ ਸਿੰਘ ਪੂਨੀਆ, ਡਾ.ਬਲਰਾਮ ਸ਼ਰਮਾ, ਲੋਕ ਨਾਥ ਸ਼ਰਮਾ ਵੱਲੋਂ ਪੁਸਤਕ ਬਾਰੇ ਡੂੰਘੀ ਵਿਚਾਰ ਚਰਚਾ ਕੀਤੀ ਅਤੇ ਲੇਖਕਾਂ ਵੱਲੋਂ ਇਤਹਾਸ ਨੂੰ ਪੁਸਤਕਾਂ ਵਿੱਚ ਸੰਭਾਲਣ ਤੇ ਜੋਰ ਦਿੱਤਾ। ਮੋਹਣੀ ਤੁਰ ਸੰਤੇਮਾਜਰਾ ਨੇ ਆਪਣਾ ਦਾਦਾ ਗੁਰਬਖਸ਼ ਸਿੰਘ ਡਕੋਟਾ ਦੀ ਦੇਸ਼ ਭਗਤੀ ਅਤੇ ਮਹਿਮਾ ਸਿੰਘ ਧਾਲੀਵਾਲ ਦੇ ਨਾਲ ਨਿੱਘੇ ਸੰਬਧਾਂ ਬਾਰੇ ਵਿਸਥਾਰ ਆਪਣੇ ਅੰਦਾਜ਼ ਵਿੱਚ ਪੇਸ਼ ਕੀਤਾ। ਰਵਿੰਦਰਪਾਲ ਕੌਰ ਧਾਲੀਵਾਲ ਨੇ ਆਪਣੇ ਬਜ਼ੁਰਗ ਮਹਿਮਾ ਸਿੰਘ ਧਾਲੀਵਾਲ ਦੇ ਸੰਘਰਸ਼ ਤੇ ਮਾਣ ਮਹਿਸੂਸ ਕੀਤਾ। ਗੁਰਦਰਸ਼ਨ ਸਿੰਘ ਜੰਮੂ ਵੱਲੋਂ ਸਾਥੀ ਮਹਿਮਾ ਸਿੰਘ ਧਾਲੀਵਾਲ ਦੀਆਂ ਯਾਦਾਂ ਸਾਂਝੀਆਂ ਕੀਤੀਆਂ ਗਈਆਂ।
ਉੱਘੇ ਸਮਾਜ ਸੇਵੀ ਅਰਵਿੰਦ ਪੁਰੀ ਨੇ ਮਹਿਮਾ ਸਿੰਘ ਧਾਲੀਵਾਲ ਨੂੰ ਨਮਨ ਕੀਤਾ ਅਤੇ ਲੇਖਕ ਔਜਲਾ ਨੂੰ ਹੱਲਾਸ਼ੇਰੀ ਦਿੱਤੀ। ਪਰਮਦੀਪ ਭਬਾਤ ਅਤੇ ਗੁਰਮੀਤ ਸਿੰਗਲ ਵੱਲੋਂ ਸਕੱਤਰੇਤ ਸਾਹਿਤ ਸਭਾ ਬਾਰੇ ਵਿਚਾਰ ਪੇਸ਼ ਕੀਤੇ ਅਤੇ ਪੁਸਤਕ ਲਈ ਸਭਾ ਦੇ ਪ੍ਰਧਾਨ ਮਲਕੀਅਤ ਸਿੰਘ ਔਜਲਾ ਨੂੰ ਵਧਾਈ ਦਿੱਤੀ। ਮੁੱਲਾਂਪੁਰ ਦੇ ਸਰਪੰਚ ਜਤਿੰਦਰ ਸਿੰਘ ਧਾਲੀਵਾਲ ਵੱਲੋਂ ਸਾਰੇ ਆਏ ਹੋਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ ਅਤੇ ਆਪਣੇ ਪਿੰਡ ਵਿੱਚ ਇਹੋ ਜਿਹੇ ਸਮਾਗਮ ਕਰਾਉਣ ਦੀ ਗੱਲ ਆਖੀ। ਮੰਚ ਸੰਚਾਲਨ ਦੀ ਜਿੰਮੇਵਾਰੀ ਰਾਜ ਕੁਮਾਰ ਸਾਹੋਵਾਲੀਆ ਵੱਲੋਂ ਬੜੀ ਤਰਤੀਬ ਨਾਲ ਨਿਭਾਈ ਗਈ। ਉਨਾਂ ਮੌਕੇ ਤੇ ਹਾਜਰ ਸ਼ਾਇਰਾਂ ਵਿੱਚੋਂ ਬਲਜਿੰਦਰਪਾਲ ਬੱਲੀ, ਭੁਪਿੰਦਰ ਮਟੌਰਵਾਲਾ, ਲਖਬੀਰ ਸਿੰਘ ਲੱਖੀ, ਧਿਆਨ ਸਿੰਘ ਕਾਹਲੋਂ, ਸੁਰਜੀਤ ਸੁੰਮਨ, ਗੁਰਮੀਤ ਸਿੰਗਲ, ਜਸਵਿੰਦਰ ਕਾਈਨੌਰ, ਪਿਆਰਾ ਸਿੰਘ ਰਾਹੀ, ਸਾਈਂ ਸਕੇਤੜੀ, ਸੁਖਵਿੰਦਰ ਨੂਰਪੁਰੀ ਨੂੰ ਵੀ ਸਰੋਤਿਆਂ ਦੇ ਰੁਬਰੂ ਕੀਤਾ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਦਵਿੰਦਰ ਸਿੰਘ ਜੁਗਨੀ, ਜਸਪ੍ਰੀਤ ਸਿੰਘ ਰੰਧਾਵਾ, ਕਰਮਜੀਤ ਬੱਗਾ, ਸੁਖਵਿੰਦਰ ਸਿੰਘ ਦੇਸੂਮਾਜਰਾ, ਭਾਗ ਸਿੰਘ ਮੁੱਲਾਂਪੁਰ, ਕੁਲਵੰਤ ਸਿੰਘ ਖੋਖਰ, ਦੇਸਰਾਜ ਸਿੰਘ, ਸੰਦੀਪ ਸ਼ਰਮਾਂ, ਸਰਿੰਦਰਪਾਲ ਸਿੰਘ, ਮਨਜਿੰਦਰ ਬਿੱਟੂ, ਬਲਵਿੰਦਰ ਢੋਲ, ਪ੍ਰਵੀਨ ਸੋਫਤ, ਅਵਤਾਰ ਸਿੰਘ ਧਾਲੀਵਾਲ, ਬਲਵਿੰਦਰ ਸਿੰਘ ਭਿੰਦਾ, ਅਮਰਜੀਤ ਸਿੰਘ ਅਤੇ ਪਿੰਡ ਦੀ ਪੰਚਾਇਤ ਦੇ ਮੈਂਬਰ ਤੇ ਪਤਵੰਤੇ ਹਾਜਰ ਹੋਏ।